Како се менува женскиот мозок по раѓањето на детето?

Научниците потврдуваат дека промената која се случува во мозокот кога добиваме дете, е слична на онаа кога се заљубуваме. Тоа обично е изразено кај младите мајки, на кои мозокот почнува да им се менува уште во бременоста.

Љубовта и грижата поттикнуваат промени во мозокот

Докажано е дека промените се случуваат во различни делови на мозокот, сивата материја се згуснува, а мозочната активност се зголемува во областите задолжени за сочувствување и социјални интеракции.

Благодарејќи токму на овие промени, како и поплавата од хормони во текот на бременоста и по породувањето, младата мајка е воодушевена со своето бебе, а со неопишливата мајчинска љубов се јавуваат и силни заштитнички нагони како и постојана загриженост.

Истражувачите велат дека во текот на првите месеци по породувањето, кај многу мајки се јавуваат симптоми на опсесивно-компулсивно нарушување, како претерано миење раце или постојано проверување дали бебето дише.

Промените во мозокот на мајката се најголеми со првото дете, но не е познато дали мозокот некогаш се враќа во состојба во каква што бил пред породувањето. Но, важно е да се напомене дека овие промени не се резервирани само за новопечените мајки.

Тие може да се забележат и кај татковците, особено кај оние кои длабоко се вклучени во грижата за бебето.