Македонка замина да работи во Виена за време на коронавирусот – ова е нејзиното искуство!

Коронавирусот донесе потешкотии во нормалното функционирање секаде во светот. Речиси да нема земја во која не беа воведени рестриктивни мерки, некаде построги некаде не, но сепак сите со иста цел – да успееме да го победиме вирусот и конечно да се вратиме на “нормалниот живот”.

Благица Ристеска од Прилеп која две години живее во Австрија заедно со семејството за mama.glamur.mk открива како во моментот оваа земја се справува со пандемијата и коронавирусот, како е да се живее во друга земја како странец, но поразговаравме и за причините поради кои заминале…

Таа во разговорот со нас ни открива дека како и повеќето Македонци желбата за подобар живот и сигурната иднина за нив и нивната ќерка биле клучни за да донесат одлука да заминат од родниот крај и да ја побараат среќата во странство, далеку од своите блиски, пријатели, роднини.

Како коронавирусот влијаеше врз граѓаните во Австрија, конкретно што се промени?

– Корона вирусот дефинитивно влијаеше на начинот на живот врз граѓаните. Почнувајќи од март месец 2020 кога короната стигна во Австрија, а со тоа и првиот „lockdown“, во рок од две недели целосно се смени сликата на Виена којашто сите ја знаеме како град полн со туристички атракции и огромен број на туристи. Но во тие две недели додека треаеше првиот „lockdown“ ретко можеше да се види човек по улиците и јавниот превоз, затворени беа сите продавници, кафулиња, трговски центри, атракции и музеи, освен маркетите за прехрана и аптеките. На почеток имавме строги препораки во однос на дружби со пријатели и роднини кои не живеат на иста адреса. Значи дел од граѓаните не можеа да се видат со своите родители скоро 2 месеци, ако не живеат на иста адреса. Казните за контакти со други граѓани беа огромни. Затворањето на фирмите влијаеше и на тоа дел од фирмите во тие неколку месеци да пропаднат. Државата им даваше помош на фирмите, но не беше доволно. Веќе во мај многу граѓани останаа без работа. Оние кои имаа регулиран престој во Австрија останаа, а оние кои беа дојдени на печалба на црно мораа да се вратат назад. Мерките се олабавија летото, но сепак Виена беше повторно празна. Потоа есента и зимата следеа вториот и третиот „lockdown“. Почнувајќи од ноември ние бевме затворени се до февруари 2021 година, овој пат мерките не беа толку ригорозни, но секако повторно се даде акцент на ограничување на контактите, носење на маски во секој затворен простор (продавници, банки, трговки, државни установи итн.), држење на дистанца итн. До ден денес во Виена не се отворени хотелите за туристи, кафулињата, а рестораните работат само за достава или земање на нарачка без да седите внатре во ресторанот. Бутиците, продавниците за мебел, домаќинство и сите други кои не се поврзани со прехрана во последнава година беа отворени севкупно можеби најмногу 4 месеци. Во поглед на психичкото здравје на граѓаните говори и фактот дека во ова време на криза или пандемија, граѓаните 4 пати повеќе барале помош од психолози и психијатри за разлика од претходно. Да напоменам дека во Австрија се водеа, а и сеуште траат Анти корона протестите, но власта е строга и глува за ваквите барања на граѓаните.

Како функционираат училиштата, градинките, и останатите образовни институции?

За разлика од Македонија, во Австрија наставата се одвива во училиштата уште од почетокот на учебната година. Учениците ја следат наставата во училиштето со задолжително носење на маски при влез и излез, во ходниците но не и во училницата за време на часот. Во училниците децата се на дистанца и наставата се одвива на смени. Редовно се проветруваат училниците, а секој понеделник или барем еднаш во неделата тие прават брз корона тест. Градинките работат нормално, децата не носат маска, за време на Lockdown родителите можат да бираат дали ќе ги носат децата во градинка или не. Некои од државните градинки бараа да не се носат во градинка децата чии еден родител е дома.

– При обнова на некој документ може да се чека и со месеци, а во нормални услови неколку дена или една недела. Речиси секогаш каде и да одиш на пр. полиција за документи, кај службеник во банка, магистрат, па и кај општ лекар треба да закажеш термин, а во некои институции може да биде тој термин и по неколку недели. Ограничувањата за купувачи во затворен простор прави огромни редици пред продавниците. Маската секогаш е проблем во јавниот превоз на пр. Кога се воведоа FFP2 маските често обезбедувањето ги бркаше патниците кои носат друга маска освен FFP2. Кај фризери, козметичари, забари може да се оди само со негативен тест за корона. Едноставно мерките го сменија цел животен ритам на граѓаните.

Австрија беше една од земјите каде што беше воведено масовно тестирање? Дали сметате дека во однос на Македонија оваа држава подобро се соочува со коронавирусот?

-Да. Првично тестовите за корона се плаќаа и цените беа пристапни за граѓаните на Австрија. Откако се воведе масовното тестирање, се воведоа и бесплатни тестови кои немора да се прават во здравствените установи, туку може да се направат во посебни пунктови за тестирање на повеќе локации во градот.

Ново е тоа што такви бесплатни тестови веќе од следната недела може да ги земеме бесплатно во продавници како BIPA.

Во однос на ситуацијата со корона вирусот, најголема промена почувствував со тоа што ги немам видено моите блиски во Македонија.

Ми недостигаат роднините и пријателите во Македонија и желбата да ги видам барем една недела е се поголема и поголема. Во однос на заминување од Македонија и доаѓањето во Австрија, односно промената на средината на почеток беше тешко, но со тек на време се навикнуваш на новата средина.

Новиот мутиран коронавирус кој беше откриен во Велика Британија беше откриен и во Австрија, како се справува земјата во моментот, колку луѓето се вакцинираат и која вакцина според Австриските власти е најдобра?

– Во моментов Австрија е во четврт карантин (Lockdown) кој требаше да трае до 11 април, но продолжи поради зголемување на бројките на заразените кои најчесто се заразени со британскиот сој. Во однос на ва кцини Австрија започна со ва*циниpaње на старите лица и здравствените работници со Астра, но здравствените работници преку петиции бараат да се набави Фајзер-овата која според нив е подобра во однос на Астра дури 50 до 80%, а и периодот на имyнизација трае само 3 недели, за разлика од Астра каде што е 12 недели.

Зошто заминавте од Македонија?

– Живееме во Виена скоро 2 години. Една од причините за да ја напуштиме Македонија е секако, потребата за подобар живот, односно подобра иднина за нас и нашата ќерка. Едноставно, сакавме и сакаме живот без стресови и нервози, земја каде што се цени трудот на граѓаните, земја каде што законите и правилата важат за сите, а не само за поединци, што тоа не е случај во Македонија. Верувам дека ова мое мислење го делат и сите други граѓани кои ја напуштиле Македонија.

Колку луѓето во Австрија се разликуваат од Македонците, дали и тие се дружељубиви, како се снајдовте ве прифатија ли веднаш или можеби ви беше тешко да се вклопите во начинот на живот?

– Сите ги опишуваат Австријците како “ладен” народ, но напротив и тие знаат да се дружат како ние. Можеби нема веднаш да станете со нив блиски пријатели, но кога ќе станете, тоа значи дека имате вистински пријател.

Инаку, станарите во една зграда секогаш ќе ве поздрават кога ќе се сретнете без разлика дали сте блиски или не. Знаат често да се заблагодарат, да бидат учтиви. Дефинитвно се еден културен народ. Знаат да ви презборат, но ако видат дека не зборувате доволно добро германски, се повлекуваат. Сакаат да се трудите и да зборувате германски дури и да згрешите. Виена е град каде што живеат луѓе од целиот свет, на секоја страна додека шетате се слуша различен јазик, дали српски, англиски, шпански, ама за да успеете да се вклопите тука, најважен е германскиот.

Што работите во Виена? Колку работата таму се разликува од работата тука во Македонија и дали можеби се работи повеќе работни саати?

– Работам во апартмани за туристи, во однос на обемот на работа одговорностите ви се дадени уште со самиот договор на работа. Работите точно часови спрема договорот, секогаш ги имате истите обврски спрема договорот и никогаш не ви се даваат нови. Не се очекува од Вас да направите ниту повеќе, ниту помалку од она што треба да биде. Во однос на работни саати кај секој граѓанин е различно. Имате професии на part-time и full-time. Значи може да работите од 10 часа неделно, па до 40 часа. Секогаш се работи 5 дена во неделата, а 2 сте слободни, ама има и исклучоци, во тој случај тие саати кои се плус најчесто се плаќаат дупло. Зависи, кај секој е различно.

Колкава е просечната плата? Дали се исплати Македонец да замине во Виена?

– Просечната плата е околу 1500 – 1600 евра. Секако дека се исплаќа, но за да ги покрие трошоците треба да работи на full-time, односно 30 до 40 часа неделно.

– Кириите за стан во Виена започнуваат од 500 евра за еднособен стан, околу 600 – 700 евра за двособен итн. Цената зависи од локацијата, дали станот има балкон, дали е празен или уреден со мебел… За влез во стан најчесто бараат 3 кирии унапред. Сметките за струја, вода, парно, интернет, мобилен чинат околу 150 евра месечно.Со една плата може да се живее. Познавам многумина кои живеат на една плата, а и ние живеевме на една плата додека јас не добив виза за престој и работа која поради пандемијата ја чекав скоро цела година.

Ќе бидат ли затворени границите за туристи годинава?

– Моментално сме во четврт карантин кој според најавите треба да трае до 2 мај. Засега нема никакви најави дали Австрија ќе ги отвори границите за туристи оваа година, се зависи дали ќе се смири состојбата со корона вирусот.

Но, да се надеваме дека бргу ќе дојдат подобри времиња…