СТPAШНА ИСПОВЕД НА ЕДНА МАКЕДОНКА: Детето не го видов 12 дена, останав без матка поради нивна грешка!

На социјалната мрежа Фејсбук, кружи страотната исповед на Дона Неделковска, новопечена мајка од Македонија која поминала низ вистинска голгота.

Под наслов Мојата приказна, таа го сподели своето болно искуство.

Во својот пост посочува дека цели три часа по породувањето со царски рез трпела хорор, ја гледала сопствената крв и ги молела докторите за живот.

-1ви Јули, 2021. Локација, озогласената болница во Тетово. Закажан царски рез во 7 наутро. Страв, возбуда, не ни сонував каков хорор следи.

Спинална анестезија, јас будна, пратам што се случува цело време. Бебето го извадија за кратко, го слушнав како плаче и веднаш го однесоа. Очекував да ме сошијат, и крај. Ама не. Слушам дека нешто не им оди како што треба. Слушам дека никако не можат да го допрат крварењето. Се вртам лево од мене гледам цел куп гази со моја крв, почнува да ми се врти и да ми се стемнува и плачам ги молам да ме спасат да не искрварам. Слушам како трчаат и носат кеси крв од трансфузиологија. Ја молев една од сестрите да ме држи за рака, да не се чувствувам толку осамено и исплашено, да ми даде малце утеха. Го молев анестезиологот да ме утеши дека се ќе биде добро. Ги молев сите присутни да ми кажат нешто позитивно, добра вест. Три часа. Хоророт траеше цели три часа и јас цело време бев будна и цел живот ми помина пред очи. После три часа, слушнав “ајде веќе затворај ја не крвари веќе”- пишува Дона.

Вели следното утро следувал уште поголем хорор за неа. Посочува дека од моментот кога цели три часа крварела и цел тим доктори се обидувале да го сопрат крварењето таа знаела дека нешто не е во ред со неа…

-Јас во полусвест, немам веќе сила, ама не сакам да заспијам. Ме однесоа во шок-соба, каде тазе родилки влегуваа и излегуваа ден по ден, а јас бев во истиот кревет без никаков напредок, не смеев да јадам, не смеев да пијам. Зошто, немав одговор. Следното утро почна уште поголемиот хорор. Почнав да повраќам на секои 30 минути. Плачев, исплашена, ги прашував зошто повраќам, што ми се случува, сестрите ми велеа “од анестезијата е, нормално е”. Трет ден. Јас се послаба и послаба, сеуште повраќам, ама воедно и стомакот ми станува тврд, целиот со грутки. Барам помош, барам одговори. Имам студирано на медицински факултет и знаев дека нешто лошо ми се случува, ама се чудев како толку доктори и сестри околу мене, кои тврдат дека не ми е ништо, дека цревата ми се мрзеливи, дека имам ГАСТРИТИС ( да, драга докторке, сеуште ги чувам СМС пораките каде ме тешиш дека имам гастритис, дека ќе ми помине ).

Не ми беше ништо? Се извинувам на читателите за тоа што следно ќе го прочитате, но има еден израз во медицината, се вика мизeрере. Тоа е кога цревата не работаат, и измет излегува низ уста. Повраќав фекалии. Доктори ме гледаа и ми кажуваа дека не ми е ништо, дека имам гастритис. Драгата докторка задолжена за царскиот ми даваше билни чаеви и ми ставаше врели шишиња на стомак. Докторке, доколку читаш, а читаш, од СЕ ИМАМ СЛИКИ. Бев слаба, ама се борев. Знаев што ми се случува и знаев дека ќе ми требаат докази.

Четврти ден. Ситуацијата уште полоша. Молам за помош и конечно некој се смилува да викнат некој постручен и да ми стават назогастрчна сонда ( црево од нос во желудник ) за да ја испрзнат содржината од желудникот и да се чека цревата да се нормализираат. Преку таа сонда ми извадија цели 5 литри течност од желудникот. Итно рентген – со количка, тогаш веќе не бев способна ниту да се движам.

Инфузии, лекови, немаше вена која не ми беше боцната. Веќе почнав да гледам страв и кај нив. Мајка ми, сопругот, цела фамилија и другари на нозе, трчаат бараат спас, молат да ме пратат во Скопје.
Ама и покрај се, ме држеа уште една вечер. Ми рекоа многу си нервозна, ќе ти дадеме дијазепам за да спиеш, не ти е ништо.

Таа вечер го молев Господ да го дочекам утрото. Знаев дека спас ме чека во Скопје. Ама таа вечер, не бев сигурна дека ќе издржам до следното утро. Ама се молев. И издржав.

Следното утре итно ме пратија во Скопје со возило од брза помош, и драгата докторка не испрати со зборовите “ако не ја примат во Скопје, не ми ја враќајте тука, немам што да и правам”. Како спиеш навечер “ДОКТОРКЕ”? 5ти јули. Ме примија во Скопје, веќе во полусвесна состојба. Итно снимање, итно инфузии и на крај, итна операција.

Се разбудив следниот ден, со огромна рана на абдоменот и не знаев што се случило. Ми кажаа дека ми е извршена хистеректомија т.е. отстранување на матката, бидејќи била некротизирана т.е. СКАПАНА.
Да, во Тетово цели 5 дена ме чувале со некроза на матка, на раб на сепса, ме лечеа со чај од нане и рузмарин. Само Господ и двајцата доктори од Скопје кои ме оперираа ме спасија и се причина зошто сум сега тука и го пишувам ова и моето дете има мајка.

Не сакам да ги именувам, ако прочитаат знаат кои се, и сакам да им кажам на двајцата и на цел тим од абдоминална хирургија и хирургот од ГАК дека сум ви вечно благодарна.

Бебето за прв пат си го видов после 12 дена, излегов од болница 15кг послаба, со хематом на секоја вена, со две огромни лузни на стомак, не можев да се движам сама, не можев да се бањам сама, не можев ништо, ама помина.

Ми требаше време да бидам спремна да зборувам на оваа тема и додека го пишував текстов требаше да преживеам се одново и чувствувам мачнина, можеби имам и грешки во континуитет, ама помина доста време и многу работи ги потиснав и закопав длабоко. Ама мораше да излезе од мене.

Со овој текст ставам крај на оваа приказна и го почнувам процесот на заборавање на оваа траума.
И да, внимавајте пред да изберете доктор, распрашајте се 100 пати ако треба, за да избегнете ваква голгота, завршува Дона.

Објавеното писмо на Дона предизвика многу реакции на социјалните мрежи, а во болницата беше испратена инспекција.

По објавување на писмото на Неделковска во болницата во Тетово е испратена инспекција. Најтрагично е што низ слична голгота поминувале и други идни мајки, а нешто слично во истата болница, при породувањето, доживеала и сестрата на Дона, па како што вели таа, се уште се чуди како воопшто си дозволила и таа да се породи на истото место.

Матичниот ми ја препорача докторката, имал доверба во неа, и ете што се случи, Вели Дона за ММС.

Како што вели Дона, таа многу крварела на породувањето и матката требало веднаш да и ја извадат. Но тие ја сошиле, а матката продолжила да крвари, па настанало некроза, па од тоа биле зафатени и цревата, па имала и преплет на црева. Но како пто вели таа, и покрај сите проблеми, најмногу ја иритира нејзиниот непрофесионален однос и чаевите што и ги давала. Според нејзино сведоштво, докторката ја советувала да испие цел литар чај, и бидејќи не можела, ја карала. Дури и на нејзината мајка, кога конечно ја пратиле за Скопје, и кажала да ја носат и воопшто да не ја враќаат, вели Дона за ММС.

Бонус галерија

Реакција на бебето кога прв пат ќе го слушне гласот на мама

Бебе со апаратче за слушање, малата Георгина, секое утро се буди со насмевка. Кога ќе го види светлото, веднаш е среќна и воодушевена. Таа е родена глува, но откако и ставиле апаратчето за слушање, секое утро кога ќе го слушне гласот на својата мајка и татко се смее и го развеселува семејството.

Видеото го објави нејзиниот татко, Пол Адисон, од Велика Британија.

Извор: Фејсбук Дона Неделковска, ММС